Mývatnssveit, eða Skútustaðahreppur eins og byggðarlagið kallast, tilheyrir Suður-Þingeyjarsýslu og er á norðaustur horni landsins. Skútustaðahreppur er einn hæstliggjandi og víðáttumesti hreppur landsins en hann er í um og yfir 277 m yfir sjávarmáli að stærð. Íbúafjöldi hreppsins er 450. Stærð Mývatns sjálfs er 36,5 km² og meðaldýpt þess aðeins um 2,5m en dýpst er vatnið um 4m². Mývatn er sérstaklega vogskorið og í því eru um það bil 50 eyjar og hólmar. Nafnið "Mývatn" dregur vatnið af mýflugum sem eiga upptök sín í vatninu.

Skútustaðir er byggðarkjarni sunnan við vatnið. Lengi vel var aðeins um að ræða sveitabæ og kirkjustað en í tímanna rás bættist við félagsheimili, sundlaug, skóli (sem nú hefur verið lagður niður og breytt í hótel), verslun, hótel og fleiri íbúðarhús. Á Skútustöðum hefur því myndast lítill íbúa- og þjónustukjarni á meðan stærsti byggðarkjarni sveitarinnar er í Reykjahlíð, norðan við vatnið. Auk þessara tveggja kjarna eru sveitabæir umhverfis allt vatnið, sumir nánast á vatnsbakkanum, aðrir lengra frá.

Einkennandi fyrir landslag Skútustaða er þyrping gervigíga sem nefnast Skútustaðagígar og liggja aðallega í kringum litla tjörn, Stakhólstjörn. Fjallasýn er líka sérstaklega falleg frá Skútustöðum; með Bláfjall og Sellandafjall til suðurs, Vindbelg og Hlíðarfjall til norðurs, Bláfjallsfjallgarðinn til austurs og Kinnarfjöllin til norð-vesturs svo fáein fjöll séu nefnd.